O lenei Matāgaluega ua ou fa’aigoaina, ‘i le “Tamiym ‘Emeth Ministries”, sa fa’avae e le Atua Silisili Ese ma le Maualuga, o le tatou Ali’i ma le Fa’aola, o Iesu Keriso lava lea. Sa o’o mai ‘iā te a’u, LouSunia The-Watchman, ‘i a’u taimi fa’atulagaina ‘i le mā māfutaga ma Iesu Keriso. Ou te fia fa’amamaluina le tulāfono 5 a le Atua lea na tu’uina atu ia Mose (Esoto 20:12). Lea ua o’o mai ai se lagona, ua ala ai le fia fa’alia o le ava ‘i o’u tamā uma e lua; O lo’u Tamā ‘oi le lagi, ma lo’u Tamā fa’alelalolagi, e ala ‘i le fa’atinoina o lenei Matāgaluega. O lenei galuega, o se Matāgaluega Fa’amanatuga Mō Rev. Sunia Take Jr. Āsiafolasa Noma’aea Sunia, o si o’u tamā peleina. O le a ou fa’atinoina lenei, mo oe si o’u tamā peleina.
- Click Here For The English Translation
- Folasaga ‘I Lo’u Tamā, O Lo’u Musumusuga
- Aso Fanau, Mātua
- Fa’aipoipoga, Fanau, Uso Ma Tuafāfine
- Tala’aga Ā’oga, Auaunaga Fa’amiliteri
- Tala’aga Soifua Tautua Mo Le Atua
- Toe Fe’au Laugaina
- Toe Upu Fa’amanatuga Mo Le Tamā
Folasaga ‘I Lo’u Tamā, O Lo’u Musumusuga
O lo’u tamā o se tagata sa tautua ma le fa’amaoni mo le Atua. Ua musumusuina a’u e lo’u tamā, e su’esu’e loloto ma le loto fa’amaoni mo le upu moni fa’atatau ‘i le Afioga a le Atua ‘i le Tusi Paia. Sa fa’apea fo’i ona musumusua a’u, e sa’ili uma mo nisi o tusitusiga sa musumusua mai e le Agaga Paia a Keriso, a’o ta’ita’ina a’u e lo’u faiā’oga moni ma le silisili e to’atasi, O Iesu Keriso lava lea! Mataio 23:10.
E ese ma le fiafia o lo’u tamā e ola tautua mo tagata e aunoa ma le lē iloa. E ui lava ‘i le tele o taimi, na lē fa’a’oaina o ia mo mea ma tagata sa ia tautua ai, sa tumau pea o ia ma le loto fiafia ma le fa’atuatua ‘i le Atua. Sa tūmau pea o mata ata’ata ‘i ana fofoga, a’o fai sana tala mālie e tausua ai. Ua ou iloa, o lo’o fa’afetai o ia ‘iā Iesu mo mea uma ua ia mauaina.
E le’o ia o se tagata mau’oa i mea a lenei lalolagi. Ae sa tumu o ia ‘i mea fa’alēagaga mai le Atua, fa’apea ma le loto alofa mo tagata uma lava, ae maise lava mo si o’u tinā. Ae sa fa’asilisili lava ia te ia, o le tatou Ali’i o Iesu Keriso. E le’o ia fo’i o se tagata mau mea, a’o mea sa ia tago lima ‘i ai, sa lava ma totoe mo lona lava soifuaga a’o ia soifua pea ‘i lenei olaga. Na loto malie lava o ia ‘i mea uma na fa’amanuiaina ai o ia. ‘I le tele o taimi, sa masani lava ona fai mai o ia nei upu ‘iā te a’u, e fa’apea; “E taui mai ā e le Atua lo’u manuia!” Tamā, e moni lava ma ua ou mautinoa, ua fa’amanuia ina oe e le Atua!
O le ala lenā ua ta’ita’i ai a’u e auauna mo le Ekalesia a Iesu, e ala ‘i lenei auala ma le loto maulalo. E fa’aogāina ai taleni ese’ese ma le poto sa foa’i fua mai e le Atua ‘iā te a’u, e fefa’asoa a’i ma ona tagata, a’o tūmau lo’u nei loto ma le fa’amoemoe. ‘Ia fai Iesu Keriso mo’u ta’iala, ma lo’u fesoasoani sili. Na musuia fo’i lo’u nei tagata e si o’u tamā, e su’esu’e ma sa’ili’ili ma le fa’amaoni mo le upu moni, ‘i le tala fa’asolopito a le Ekalesia a Keriso. O Le ā le mea na tupu ‘i le Ekalesia a Keriso? ‘I le amataga a lona Ekalesia, a’o ta’ita’ina a’u e lo’u fesoasoani sili, o le Agaga Paia a Iesu lava lea. Ou te su’esu’e mo le upu moni mo lo’u lava tagata, po’o le ā le mea moni sa tupu, ua ala ai lenei fe’ese’ese āi’ga o tatou le Tino a Keriso. Lea ua tata’i ai tatou i le mea o lo’o tatou i ai nei. “UA VAEVAEINA” tātōu i matā’upu, talitonuga, a’oa’oga, ma le tele o Ekalesia ese’ese.
Ae le’i faimalaga atu o lo’u tamā e fa’atasi ma Iesu Keriso, sā 61 tausaga a lona soifuaga. O le alalafaga e sūsū mai ai o ia, o Utulei ‘i Tutuila. Ae sa nofo mau o ia ‘i le nu’u o Kapolei ‘i le motu o Oahu ‘i Hawai’i. Na fa’amanavaina e Iesu Keriso ana tiute ma galuega fa’alelalolagi, ‘i le Tēsema 31 2020. Ua ia ulufale atu ‘i ana tiute fa’alelagi, o lo’o saunia ma fa’atulagaina mai e Keriso mo ia. O lenei matāgaluega ua ou fa’atulagaina, e fai ma se fa’amanatuga mo le tamā peleina.
O ia o se tamā sa tumu ma le loto maulalo, sa ia fa’amuamua ‘i mana’oga a isi. Sa tumu o ia ma le loto fa’amagalo ma le alofa, ae fa’asilisili ai fo’i ona tumu o ia ma le loto onosa’i. Na ta’ita’ia a’u e Iesu ‘i lenei mau ‘i le Tusi Paia; Filipi 2:3-4, na fa’apea ona ia fai mai ‘iā te a’u, o lenā mau, o se fa’apu’upu’uga ma le manino, i uiga ese’ese a lo’u tamā. ‘Ina ua ou faitau atu ‘i ai, e moni lava ma le fa’amāōni le saunoaga a lo’u Matai.
“Aua ne’i faia se mea e tasi ma le finau vale, ma le mitamita fua; a ‘ia ta’itasi ‘outou ma manatu ma le loto maulalo, ‘ua sili nisi ‘iā te ia. ‘Aua ne’i ta’itasi ma va’ava’ai i ana lava mea, a ‘ia ta’itasi ma va’ava’ai i mea a isi.”
Aso Fanau, Mātua
Na fanau lo’u tamā ‘ia Ianuari 23 1959, ‘i Utulei ‘i Amerika Samoa. O le suafa o lona tamā o Noma’aea Take Nāseri Sunia mai le alalafaga o Pava’ia’i, a’o lona tinā o Aisaka Tupua Ta’atasi Noma’aea Sunia mai Utulei. E sau mai lo’u tamā se gafa umi ‘i āiga o faifeau ‘i ‘itū uma e lua a lona āiga. O ia fo’i o se tagata o le Atua, sa matuā mitamita tele ‘i lana aganu’u fa’a Samoa mai lona ola tuputupu a’e, se ‘ia o’o mai lava ‘i lona matua. A’o avea o ia ma tama’ititi, sa fiafia o ia e fa’aālu lona taimi ma le aiga. Sa fa’apea fo’i ona fiafia o ia e fai pesega, e faitau ‘i lana Tusi Paia, ae sa fa’asilisili ai ‘iā te ia le olaga fa’alelotu.
Fa’aipoipoga, Fanau, Uso Ma Tuafāfine
Na fefa’asuia’i ana tautōga ma si o’u tinā o Leleō Sialegā Maluia Ponā Leaea Sunia, ‘i le Iulai 31 1982. Na Fa’apa’iaina ‘i la’ua ‘i le Ekalesia Fa’alāpotopotoga Kerisiano ‘i Amerika Samoa (EFKAS) ‘i le alalafaga o Nu’uuli. Sa fa’apea fo’i ona fa’apaiaina le la’ua tautōga lē gausia, e le Faifea’u ua fai’i lagi lona folauga, o le susuga ‘i le Fa’afeagaiga ‘iā Valentino Pase.
‘Ina ua mae’a le lā’ua fa’aipoipoga ma lo’u tinā ‘i le 1982, ua fa’amanuiaina e le Atua ‘i la’ua. O le tausaga 1983, na fanau ai le lā’ua ulumatua. O lona afafine o Savaliōlefilēmū Mulivae Sunia. ‘I le 1984, na fanau ai a’u, o le ulua’i atali’i matua a o’u mātua; Louganis Take Sunia – Lou (Āvā: Mikaila Mamo-Lei Afoa Sunia). ‘I le tausaga 1986, na fanau ai lona atali’i lona lua; Take Jr Kenneth Sunia – Jr (Āvā: Mara Selu Sunia – Afafine a Jr: Tāmara Leila Sunia). ‘I le tausaga 1988 na fanau ai lona atali’i lona tolu; Anthony Ponā Sunia – Tony (Āvā: Kawehi Makuakane Sunia – Afafine a Tony: Moana Leleō Sunia – Atali’i a Tony: Liam Ma’alaelu Sunia). Mulimuli ane, ‘i le tausaga 1990, na toe fa’amanuiaina ai o’u mātua ma se afafine lona lua, Latanya Marsha Fa’asiliōtama’ita’i Sunia. Ona atoa ai loa o le to’a fitu o matou, ‘i le tu’ufa’atasiga o le matou aiga atoa ma o’u mātua.
Sa avea o ia ma se tamā agalelei ma le lagolago malosi ‘i le matou aiga. O se tamā fa’amoemoeina, ma sā ia a’oā’ia ‘i matou le fanau ‘i le tele o taimi. E leai lava se fa’aletonu na o’o mai, pe a o’o ‘i ana uiga alofa, fa’apea fo’i ma le tausiga o matou le fanau. O se tamā sa fiafia ‘i le tausiga o le fanau a lona fanau, ae sa fa’asilisili ai ‘iā te ia, o le tausiga o si ā matou tinā peleina.
E le gata fo’i ‘i le matou tinā, o lona fanau ma le fanau a lona fanau, o lo’o soifua pea lona uso; Pi’i Noma’aea, tuafafine; Sinaletoaga Taumanupepe, tuafafine; Mereane Bailey Murray, tuafafine; Luisa Sunia, tuafafine; Malama Sunia-Faoliu, uso; Noma’aea Fa’alanita’a Sunia, tuafafine; Mulivae Chong, uso; Togia Aitofele Sunia, uso; Afa Sunia, Uso; Tavita Sunia ma le uso ia Lolesio.
Na mua’i ‘i malae le folauga o lona tinā i le tausaga 1985. Ona soso’o ane ai lea ma lona tamā ‘i le 2002. Ae mulimuli ane ai o lona tuafafine, o Katie Aisaka Sunia Gebauer ‘i le 2008. O lo’u tamā o le matua lona 7 ‘i le fanauga a ona mātua. O ia fo’i o le ulua’i atali’i matua moni lava a ona mātua.
Tala’aga Ā’oga, Auaunaga Fa’amiliteri
A’o tama’ititi o ia, sa amatalia ana a’oa’oga ‘i le fale ma ona matua, ma le ā’oga Samoa (A’oga Faife’au – Ref: 2.3.5 – page: 23 & 24) ‘i Utulei, fa’apea fo’i ma le ā’oga o Matafao, mai le tausaga 1961, se ‘ia o’o atu ‘i le 1974. ‘I lenā lava tausaga se ‘ia o’o atu ‘i le 1976, na ā‘oga ai o ia ‘i le ā‘oga mauluga o Samoana. Ona fai malaga atu ai lea o ia ‘i Kalefonia ‘i le 1976. Mulimuli ane, na ulufale atu o ia ‘i le ā‘oga mauluga a Carson ‘i Kalefonia i le 1976, ona fa’ai’u ai ma le manuia lona ā‘oga ‘i Carson ‘i le tausaga 1978.
‘Ina ua ma’ea lona fa’au’uga ‘i le 1978, ona ulufale atu ai lea o ia ‘i le militeri a Amerika. Ona galue malosi ai lea o ia ‘i lea vaega tau o le malō, ‘i le matātā o le Neivi, a’o le tiute o le active. Mulimuli ane, na fa’amalōlōina ma le fa’aaloalo o ia mai lona active duty ‘i le Neivi, ‘i le tausaga 1981.
‘I le tausaga 1982, na ulufale atu ai o ia ‘i le American Samoa Community College, ma fa’au’uina ai ‘i le tausaga 1985. Na maua ai lona Assoiciate in Science tīkērī, ‘i le Automotive Mechanic ‘i le tausaga 1985. ‘Ina ua mae’a lona ā‘oga ‘i le kolisi ‘i Tutuila, ona si’itia ane ai lea o’u mātua, o a’u ma lo’u tuafafine matua mo Kalefonia ‘i le tausaga 1985.
‘I le tausaga 1987, na toe lesitalaina ai o ia ‘i le malō a Amerika ‘i le matātā o le Neivi, ae ua suia ana tiute ‘i tiute o le reservist ‘i le 1987. ‘I le tausaga 1993 na fa’amalōlōina ai ma le fa’aaloalo ana tiute mai le Neivi a Amerika.
Tala’aga Soifua Tautua Mo Le Atua
Sa ou nofo ma fa’asolosolo o’u mafaufauga, ona ou manatuaina ai lea. ‘i le tausaga 1992 a’o ou tama’titi ma matou nonofo ‘i Kalefonia ma o’u mātua. Sa ou mata’ina se suiga ese ‘i lo’u tamā. Na amata ‘i le tāōfi o le inuga ava malosi, ona ou va’aia ai lea le alu so’o o lo’u tamā ‘i le matou fale ta’avale. Sa fealu a’i lava ma lona Tusi Paia, aemaise lava ‘i taimi e alu ai ‘i le matou fale ta’avale.
Talu ona ou va’aia nei suiga ‘iā te ia, ua foliga mai, e lē pei o ia o le tamā sa ou iloaina talu ona ou itiiti. Sa ‘iai fo’i se tasi o taimi ua ou manatuaina, na maligi ai ona loimata a’o talanoa o ia ‘i lo’u tinā fa’apea matou le fanau. E le’i manino lava ‘iā te a’u le mea sa tupu ‘iā te ia ‘i lenā vai taimi. A’o lenei ua ou matua, ma ua matala o’u mata fa’aleagaga, ua ou malamalama ma le manino. ‘I le mea sa tupu ‘i lo’u tamā ‘i lenā vaitaimi a’o matou nonofo ‘i Kalefonia ‘i le 1992.
‘I le tausaga 1993, na faimalaga ane ai le matou aiga atoa ‘i Tutuila ma si o’u tamā. Ua ia tu’ua le vaega tau mo le malō a Amerika, ae ulufale atu ‘i le vaega tau mo le malō a le Atua. Sa ia ulufale atu ‘i le ā‘oga fa’afaife’au ‘i Kanana Fou. Ua o’o atu ‘i ai le vala’au pa’ia ma le loloto a le Atua, e fa’aogāina o ia ma mea faigaluega a le Atua ‘i so’o se ala lava a le Atua. Ua fa’alia mai e le Agaga Paia a Keriso ‘iā te a’u, ‘i le taimi tonu lava lea a’o ou tusitusiina ai o lenei molimau. O le ala moni lava lea sa avatu ‘i ai o lenei igoa ia te ia a’o tama’ititi, “ASIAFOLASA”. Sa fa’apea ona musumusu mai le Agaga Paia ia te a’u, ‘i le uiga tonu lava ma le fa’amoni, o lenā suafa sa aumai sa’o ia Iesu. “O ia o se Alia o le ā Folau atu ‘i le Atu Vasa. Na te Āsia le fanau pele o le Atua ‘i le isi itū o le Folasa. E molimoli atu ai le tala lelei a Iesu Keriso, ‘i ana tagata o lo’o fiafia e ola tata’a.” O lenei, ua mae’a lona galuega. Auā e tele lava auala ese’ese na ia faʻataunu’uina ai o lenā fea’u i lona olaga atoa.
Na fa’ai’uina ma le manuia lona ā’oga fa’aseminare ‘i Kanana Fou ‘i le tausaga 1998. ‘I le tausaga 1999, na fa’amanuiaina ai o ia e le Atua, ma avea ai o ia ma Faife’au Fa’au’u. Ona faimalaga ane ai lea o lo’u tamā, lo’u tinā, o a’u, o o’u uso lāiti e to’alua ma le tuafafine la’ititi, mo Aukilani ‘i Niu Sila. A’o lo’u tuafafine matua, sa alu atu e nofo ma nisi o āiga a lo’u tamā.
Na fa’amanuiaina si o’u tamā, ma amatalia ai lona ola auauna mō le Ali’i o Iesu Keriso, ‘i le EFKAS ‘i Aukilani Māgele. Na ia tautua ma fafagaina ‘itū fa’aleagaga a lenā Ekalesia, mo le isi 8 o tausaga o lona soifuaga. Ona fa’amalōlō ai lea o ia mai Niu Sila ‘i le tausaga 2007. ‘Ina ua fa’amalōlō lo’u tamā, ona faimalaga ane ai lea o ia ma lo’u tinā, o lo’u uso ma le tuafafine lāīti, ma ua si’itia atu i latou mo Hawaii.
Ona nofo mau ai lea o ia i’inā, ma o i’inā fo’i na toe matou feiloa’i ai ma le manuia ma o’u mātua. Ua toe tu’u fa’atasia e le Atua le matou aiga atoa. Ona matou nonofo mau fa’atasi ai lea ‘i Waipahu ‘i le motu o Oahu ‘i Hawaii ‘i le 2007. O matou uma e to’afitu. Ona fa’aāuāu ai lea o lona ola auauna mo Iesu, e ala ‘i lona taliaina e nofo ‘i le tulaga o le tofi Fa’afaife’au Fesoasoani, mo le EFKAS Kanana Fou ‘i Waipahu, mai i le 2007-2011.
I lenā lava tausaga i le 2011, na si’itia ai o ia ma lo’u tinā ‘i le motu tele o Hawaii ‘i Hilo. Ua ia taliaina se tulaga galuega fa’amisionare ‘i lea atu motu. Ua fai o ia ma Faifea’u mo alo ma fanau Samoa o lo’o ā’o’oga ‘i le Univesetē a Hawaii ‘i Hilo. Sa lā’ua tautuaina ma fafagaina ‘itū fa’aleagaga a lenā Ekalesia, se ‘ia o’o atu ‘i le tausaga 2016. Ona toe fa’amalōlō ai lea o lā’ua, ma ua toe faimalaga atu ‘i le motu o Oahu ‘i le 2016. Ona āumau ai lea o lā’ua ‘i Ewa Beach ma lo’u tuafafine la’ititi.
‘I le 2017, na si’itia ai o lā’ua mo Kapolei i Oahu ma lo’u tuafafine la’ititi. Talu ona lā’ua toe si’itia mai le motu tele o Hawaii i Hilo, e le’i tu’ua lava o lona ola fia auauna mo le Atua. Sa fa’aāuāu lona auaunaga Fa’a Faifea’u Fesoasoani, mo le EFKAS Kanana Fou ‘i Waipahu.
Toe Fe’au Laugaina
‘Ina ua ou nofonofo ‘i le fale a o’u mātua, sa ou tau ane ‘i lona Tusi Paia. Ma oi totonu, sa ‘i ai pea o lenei fasi pepa o lo’o gaugau, o lo’o tusitusi ai o lona lauga mulimuli lea sa fai. ‘Ina ua ou faitau ‘i ai, sa ou manatuaina lelei lava. Ona o lenā fe’au sa ia molia, sa ou lagonaina ‘i lenā aso Sā o le Fa’amanatuga Paia a Keriso. O le aso Sā mulimuli fo’i lenā na ia lauga ai. E lagona le fiafia ‘i le loto, ona sa ou auai ‘i le lotu ‘i lenā sauniga mulimuli sa ia ta’ita’ia.
O le aso muamua a Novema 2020, na ia fofogaina ai o lenei fea’u mulimuli ‘i le EFKAS a Kanana Fou ‘i Waipahu. O le manatu ‘autū o lona toe fe’au, “O Puapuagā Ma Le Fa’amoemoe.” O se fe’au matagofie lea sa ia folafolaina, ona o lea ua vala’auina o ia, e “LE FA’AMOEMOE” lea sa ia laugaina ‘i lea lava aso Sā. Lea na tu’u folau ai lona folauga ma lona Matai ‘i le vaeluaga o le tausaga fou 2020.
Na ia taʻua ma faʻamalosia se mau ‘i lona fea’u. Sa fa’apea ona ia fai mai; “Ua Tatou Maua Le Leleiga Ma Le Filemu Mai Le Atua, E Ala ‘I Lō Tatou Ali’i O IESU KERISO.” Roma 5:1. Na ia ta’ua ‘i ana tusitusiga, “O le feau a Paulo ‘i le Roma 1-4, o loʻo manino ma faapea o lona faʻamatalaga; E leai se tagata amiotonu auā ua agasala uma tagata.” Roma 3:10. “O Le Atua e pai’a, e lē mafai ona fa’alatalata i ai se tagata agasala.” E mana’omia le salamō moni, ma fa’aāuāu ona ola ma se olaga amiotonu, ma aua le toe fuli atu ‘i au uiga tuai. E pei o Paulo ‘i le taimi na vala’auina ai o ia e Iesu, e tala’i atu le tala lelei ‘i tagata nu’u ese. Sa ia tauaso. Ua silasila le Atua ‘i lona loto, sa fa’amaoni lona salamō mai ona puapuagā. ‘I le ma lea, ona toe fa’afo’i ane ai lea o lona va’ai ina ua mae’a aso e tolu. Ona fa’aāuāu ai lea ona ia faia se’ia o’o i lona gata’aga, ma le lē toe fuli tua. O le uiga lenā o le salamō moni! E ese ma le manaia o le fea’u. O nisi o mau sa ia fa’aogāina ma sa fa’atatau ‘i ai o lona toe feau, e maua ‘i le Roma 5, fuaiupu 3, 4 ma le 6.
“E lē gata fo’i i lea, a ‘ua latou mitamita fo’i i puapuagā, ‘ina ‘ua tatou iloa o le puapuagā e tupu ai le onosa’i, o le onosa’i e tupu ai le mautinoa, o le mautinoa e tupu ai le fa’amoemoe;” “Auā na maliu Keriso i ona po e tatau ai, ‘ina o vaivai pea i tatou o le sui o ia o ē fa’alēmata’u.”
Sa fa’apea ona ia tautuaina ma le fa’amaoni lenā Ekalesia, se ‘ia o’o atu ‘i ona toe aso, ‘ina ua o’o mai le vala’au paia a “LONA FA’AMOEMOE”. Ua fa’apea atu o lona fa’amoemoe ia te ia, e ulufale atu ‘i lona manuia, ‘i le Tēsema 31, 2020 ‘i le 5:05 PM.
Toe Upu Fa’amanatuga Mo Le Tamā
Tamā, ua matuā’i ou misia lava oe ma le tigā. Fa’apea fo’i ‘i le tatou aiga atoa, ‘i uo ma ē sa masani ‘iā te oe, aemaise lava o si o’u tinā. O lesona e tele ua e tu’ua ma ‘i matou, ua fa’ailia ai le alofa a Keriso, ma o le a teu mau ‘i le matou loto. Tamā, sa e tau ma le fa’amaoni ‘i lau taua lelei, ma ua i’u ma le manuia lau tausiniōga ma le fiafia. Sa tumau lava lau “FAATUATUA IA IESU KERISO”, e o’o lava ‘i lau gata’aga. E tele lava o lesona sa e a’oa’oina ia te a’u, a’o le lesona silisili ma le taua ua ou maua mai ia te oe, o lenei feau silisili ma le taua ou te fa’asoa atu mo tagata uma lava; “O lo’u ola, ua ia Keriso lea, a’o lo’u oti, o lo’u manuia lea.” 2 Timoteo 4:7 ma le FILIPI 1:21.
Fa’afetai lava tamā ona o le avea o oe ma fa’ata’ita’iga lelei ia te a’u. Fa’afetai mo mea uma sa e faia mo a’u. E lagona lava o lo’u fa’anoanoa, auā e lē toe va’aia oe ‘i lenei olaga. Ae e ui ‘i lea, ua ou iloaina, o le a ta feiloa’i ‘i se taimi o lata mai. Pe a o’o mai le fa’asologa o le vala’au paia o le Matai, o Iesu Keriso lava lea o lo’u tautai. Tamā, o lenei matāgaluega, e momoli atu ai o’u au alofa mo oe. Alofa atu mo oe tamā.
O Alofa’aga Mai Lou Atali’i,
Louganis Take Sunia – Lea fo’i ua fa’aigoa ina ia; LouSunia The-Watchman
Ma’imoa ane ‘i lenei ata fa’amanatuga sa ou faia, ‘i le toe sauniga o si o’u tamā, ‘i le toe 30 minute ae le’i tu’u atua o lona tino ‘i le ele’ele. Ma’imoa ane se’ia o’o ‘i le i’uga, mo se fa’apitoa matagofie sa fa’atulagaina e si o’u to’alua. O lenei fa’apitoa matagofie, e fai ma fa’amanatuga ‘iā ‘i ma’ua ma lo’u to’alua. ‘I fa’aliga ‘ese’ese a le Atua ae le’i maliu o ia, fa’apea fo’i ‘i taimi a’o matou sauniuni atu mo lona toe aso. A fa’apea e te fia faitau ‘i le molimau a lo’u to’alua i nei fa’aliga ese’ese mai le Atua, o lo’o tūsia i le gagana Peritania, o’omi ane i’inei. Pe e te tusi ane ai fo’i ‘iā te ia, po’o lo’u fo’i nei tagata e ala i se comment ifo ‘i lalo o lenei molimau mo se fa’amatalaga atili. Ia manuia lau ma’imoaga. Ia fa’amanuia atu le Atua, mo lau molimau ina o lenei galuega fa’amanatuga mo si o’u tamā, lea sa ou tu’u faatasia, a’o fa’atasi mai le Agaga Paia a Iesu Keriso. Soifua ia ona o Iesu.
